ಪರಿಭ್ರಮಣ

ಬದುಕೆಂಬುದು ಮಾಯೆ ಸಿಹಿಕಹಿಗಳ ಮಿಳಿತ

ಜೀವನದ ಕಡಲಿನೊಳು ಸುಖ ದುಃಖಗಳದೇ ಏರಿಳಿತ

ಸಂತಸದ ಕ್ಷಣಗಳವು ಬಲು ಬೇಗ ಸಾಗುವವು

ಸಮಯದ ಪರಿವೆಯನೇ ಮರೆಸಿ ಉರುಳುವವು

ಆ ಕ್ಷಣದ ಬದುಕನ್ನು ಸವಿಯಬೇಕು ಮನಸಾರೆ

ಜತನದಿ ಕಾಪಿಡಬೇಕು ನೆನಪುಗಳ ಪೆಟಾರೆ

ಬದುಕ ಪರೀಕ್ಷಿಸುವ ಕಾರ್ಪಣ್ಯಗಳು ಹಲವಾರು

ತಾಳ್ಮೆಯು ಬೇಕು ಎದುರಿಸಲು ವಿಧಿ ಕೈಯ ತಲವಾರು

ನೋವ ಉಳಿಪೆಟ್ಟುಗಳ ಹೊಡೆತ ಸಹಿಸಲು ಬೇಕು

ಬವಣೆಗಳ ವೇದನೆಯ ಜಯಿಸಿ ನಿಲ್ಲಲು ಬೇಕು

ಬದುಕೊಂದು ಗೋಲ ಪರಿಚಲಿಸುವುದು ಸದಾಕಾಲ

ನೋವು ನಲಿವು ಎರಡು ಧ್ರುವಗಳು...

ಬದುಕ ನಾಣ್ಯದ ಎರಡು ಮುಖಗಳು...

ಗೋಲ ನಿರಂತರ ಪರಿಭ್ರಮಿಸಲೇ ಬೇಕು.....

ಧ್ರುವಗಳು ಅದಲು ಬದಲಾಗುತ್ತಲೇ ಇರಬೇಕು....