ಅವಲೋಕನ

ಪ್ರಕಟವಾಗದೇ ಉಳಿದ ಅವ್ಯಕ್ತ ಭಾವಗಳಿಗೆ ಮನವೇ

ತುರಂಗ 

ಜಗವೇ ಮರೆತ ಪುಟಗಳ ನಡುವೆಲ್ಲೋ ಅವುಗಳ ಮೌನ ತರಂಗ

ಶುಷ್ಕ ಸಂಬಂಧಗಳು ಕಿಸುರಿನೊರೆಯಾಗಿರೆ ನುಡಿಗಳಿಂದಲೇ ಹನನ ಭಾವಗಳ ಅವಸಾನ

ಗಂಟಲ ಸೆರೆಯುಬ್ಬಿಸುವ ನೀರವ ಏಕಾಂತದೊಳಗೊಂದು ಆತ್ಮಾನುಸಂಧಾನ 

ಬರಡಾಗಿದೆ ಅಂತರಂಗದ ಒರತೆ ಬಿರುಕೊಡೆದ ಮನೋಭೂಮಿಯೊಳು ಭಾವಗಳ ದಹನ

ಸಂವೇದನಾರಹಿತ ಸ್ತರ ತಲುಪಿದೆ ಹೃದಯ ಆಗಬೇಕಿದೆ ಚಿತ್ತವೃತ್ತಿಯ ಪುನರಾವಲೋಕನ

ಘಾಸಿಗೊಂಡ ಮನವೇ.... ಸಾಕಿನ್ನು ಭಾವಾವಲಂಬನೆಯ ಹಂಗಿನ ಅನುಭವ

ನಡೆಯೆ ಅಂತರಾತ್ಮನ ದಿವ್ಯ ಚಿಂತನಾಪಥದೊಳು ಅದುವೇ ಸಾಕ್ಷಾತ್ಕಾರದ ಅನುಭಾವ

ನನ್ನ ಮರೆತ ನೀನು..... ನಿನ್ನೊಳಗಿನ ನಾನು....

ನೀನೆಂಬ ವಾಕ್ಯದೊಳಗಿನ ಪುಟ್ಟ ಪದ ನಾನು
ಕಂಡಿಕೆಗಳ ಸಂಗದಲ್ಲಿ ಮೈ ಮರೆತಿರುವೆ ನೀನು

ನೀನೆಂಬ ಸಂಪುಟದ ಪರಿವಿಡಿ ನಾನು
ಪುಟಗಳ ಸಾಮೀಪ್ಯದೊಳು ಹಿತವಾಗಿಹೆ ನೀನು

ನೀನೆಂಬ ಆಗಸದೊಳು ತೇಲುವ ಮೇಘ ನಾನು
ಬೆಳದಿಂಗಳ ಬೆಡಗಿಗೆ ಮನಸೋತಿಹೆ ನೀನು

ನೀನೆಂಬ ಶರಧಿಯಾಳದಲ್ಲಿ ಹುದುಗಿದ ಮುತ್ತು ನಾನು
ಅಲೆಗಳ ಚಿನ್ನಾಟದಲಿ ಸರಸಿಯಾಗಿಹೆ ನೀನು

ನೀನೆಂಬ ನಿನಗೆ ಬಿಂದು ನಾನು....
ನಿನ್ನೊಳಗಿನ ನನಗೆ ಸಿಂಧು ನೀನು.....

ನಿರೀಕ್ಷೆ

ನಿಗಿನಿಗಿ ಉರಿದು ಕೆಂಡ ಸುರಿವ ಸೂರ್ಯನ ತಾಪಕೆ....
ಬಳಲಿ ಬರಡು ಬೆಂಗಾಡಾಗಿ ಬಾಯಾರಿದ ಇಳೆಗೆ....
ಇರುವುದು ಒಂದೇ ಪ್ರತೀಕ್ಷೆ.......
ಮೈ ಮನಕೆ ತಂಪೆರೆವ ಮುಸಲಧಾರೆಯ ನಿರೀಕ್ಷೆ.....

ಕಡಲ ತಟದಲಿ ಉಸುಕು ಹಾಸಿದೆ ಚಾದರ....
ಅಲೆಗಳ ಏರಿಳಿತದ ನಾದ ಸಂಗೀತದ ಝೇಂಕಾರ....
ದಿಗಂತಕೆ ಬಾಯ್ತೆರೆದ ಚಿಪ್ಪಿನದು ಒಂದೇ ಪ್ರತೀಕ್ಷೆ....
ಬಿದ್ದ ವರ್ಷ ಬಿಂದು ಮುತ್ತಾಗುವ ನಿರೀಕ್ಷೆ.......

ಗಿರಿಮಲೆಗಳ ದಟ್ಟ ಕಾನನದ ನಡುವಲೆಲ್ಲೋ ಉಗಮಿಸಿ...
ನದಿ, ತೊರೆ, ಝರಿಯಾಗಿ ಬಳುಕಿ ಇಳಿಜಾರಿನೊಳು ಧುಮ್ಮಿಕ್ಕಿ....
ಜೀವಸೆಲೆಯಾಗಿ ಹರಿವ ವಾಹಿನಿಯದು ಒಂದೇ ಪ್ರತೀಕ್ಷೆ...
ಶರಧಿಯನು ಸಂಗಮಿಸಿ ಬೆರೆಯುವ ನಿರೀಕ್ಷೆ......

ಮನದ ಕೋಣೆಯಲ್ಲೆಲ್ಲೋ ಆವಿರ್ಭವಿಸುವ ಸೆಳೆತ....
ಹೃದಯಾಂತರಾಳದಲ್ಲಿ ನವಿರು ಭಾವನೆಗಳದೇ ಮಿಡಿತ...
ಧಮನಿಯ ಪ್ರತಿ ಬಡಿತದ ರಾಗತಾಳಕ್ಕೂ ಒಂದೇ ಪ್ರತೀಕ್ಷೆ....
ಉಸಿರ ಬಾಂದಳದಲ್ಲಿ ಒಲವ ಶಶಿ ಮೂಡುವಾ ನಿರೀಕ್ಷೆ.....