ನಾಮಧೇಯ ಪುರಾಣ

ಹೋಯ್......

ನಮಸ್ಕಾರ ಮಾರಾಯ್ರೇ...

ಮುಂಚೆಯೆಲ್ಲಾ ನಮ್ಮ ಭಾರತೀಯ ವಾಯುಗುಣದಲ್ಲಿ ಮೂರು ಕಾಲಗಳಿದ್ವು . ಬೇಸಿಗೆ ಕಾಲ, ಮಳೆಗಾಲ, ಚಳಿಗಾಲ ಅಂತ. ಇದು ನಿಮಗೂ ತಿಳಿದ ವಿಚಾರವೇ . ಆದರೆ ಯೋಗಗಳ ಸಾಮ್ರಾಟ ಭಟ್ರು 'ಇಂಡಿಯಾನೇ ಫಾರಿನ್ನಾಗ್ಲಿ' ಅಂತ ಅದ್ಯಾವ ಘಳಿಗೆಲೀ ಹೇಳಿದ್ರೇನೋ. ಇಂಡಿಯಾ ಫಾರಿನ್ನಾಗೇ ಹೋಗಿದೆ....!! ಬಿರುಬೇಸಿಗೆಯ ಮಾರ್ಚ್, ಏಪ್ರಿಲ್ನಲ್ಲಿ ಮಳೆ ಬರುತ್ತೆ. ಮಳೆ ಕಾರಣ

ಶಾಲೆಗೆ ರಜೆ ಸಿಗ್ತಿದ್ದ ಜೂನ್, ಜುಲೈಯಲ್ಲಿ ರಣಬಿಸಿಲು.....

ಸೋ ...... ಈ ಮೇಲಿನ ಸಾಕ್ಷಾಧಾರ ಪುರಾವೆಗಳನ್ನು ಪರಿಗಣಿಸಿ ನಾವು ಏನು ಹೇಳ್ಬೋದ್ದಪ್ಪಾ ಅಂದ್ರೆ.......... ಮೂರುಕಾಲಗಳು ಲೋಪ ಸಂಧಿಯಾಗಿ ಒಂದೇ ಕಾಲ ಆಗಮ ಸಂಧಿಯಾಗಿದೆ. ಹಾಗೆ ಆಗಮಾದೇಶವಾಗಿರುವ ಕಾಲವೇ ಪೋಪಿಕಾಲ......

ಈ ಪೋಪಿಕಾಲ ಅನ್ನೋದು ತುಳುನಾಡಿನಲ್ಲಿ ಸ್ಟೇಟ್ ಬ್ಯಾಂಕಿನಲ್ಲಿ ಮೀನು ಸಿಕ್ಕುವಷ್ಟೇ ಸಾಮಾನ್ಯವಾಗಿ ಕೇಳ್ಲಿಕ್ಕೆ ಸಿಗುವ ಪದ. ಈ ಪೋಪಿಕಾಲ ಎಂಬ ಹೋಗುವ ಕಾಲವನ್ನು ಪರಂಧಾಮಕ್ಕೆ ಹೋಗುವ ಕಾಲ ಅಂತ ಅರ್ಥೈಸಿಕೊಳ್ಳಬಹುದು ನೀವು. ಇಂತಹ

ಪೋಪಿಕಾಲ ಆಗಮಿಸಿರುವ ಈ ಸಂದರ್ಭದಲ್ಲಿ ವೈರಸ್ಸು , ಬ್ಯಾಕ್ಟೀರಿಯಾಗಳ ಹಾವಳಿ ವಿಪರೀತವಾಗಿ ಜನ ಏನೇನೋ ಕಾಯಿಲೆಗಳಿಗೆ ತುತ್ತಾಗ್ತಿರೋದು ನಿಮಗೆ ಗೊತ್ತಿರುವ ಸಂಗತಿಯಷ್ಟೇ. ಅಂತಹದೇ ಒಂದು ಪೋಪಿಕಾಲದ ವೈರಸ್ಸಿನ ಬಗ್ಗೆ ನಿಮಗೆ ಮಾಹಿತಿ ನೀಡ್ಬೇಕಿತ್ತು ನೋಡಿ. ಈ ನಿಫಾ, ಕಫಾ, ಕೆಎಫ್ಡಿ, ಚಿಕುನ್ ಗುನ್ಯಾ , ಕೋಳಿ ಜ್ವರ, ಹಂದಿ ಜ್ವರ, ಡೆಂಗ್ಯೂ ಇತ್ಯಾದಿ ವೈರಸ್ಸುಗಳ ಗುಂಪಿಗೆ ಸೇರದ ಹೊಸ ತಳಿಯ

ವೈರಸ್ಸಿನ ಹಾವಳಿ ಇತ್ತೀಚಿಗೆ ಭಾರತದಲ್ಲಿ ಭಯಂಕರವಾಗಿದೆಯಂತೆ. 

'ಇದ್ಯಾವ ವೈರಸ್ಸಪ್ಪಾ ?' ಅಂದ್ರಾ....??

ಅದೇ 'ಆಂಟಿ' ವೈರಸ್......!!

ಖಂಡಿತಾ ಸ್ಪೆಲ್ಲಿಂಗ್ ಮಿಸ್ಟೇಕ್ ಆಗಿಲ್ಲ.

ನಾನು ಹೇಳ್ತಿರೋದು aunty ವೈರಸ್ಸೇ..... anti ವೈರಸ್ಸಲ್ಲಾ....

ನಾವು ಭಾರತೀಯರು ಮುಂಚಿನಿಂದಲೂ ಕೂಡು ಕುಟುಂಬದಲ್ಲಿ ಬಾಳಿದವರು. ಈಗೀಗ ಪೋಪಿಕಾಲದ ಆಟೋಪಟೋಟದಿಂದ ವಿಭಕ್ತಕುಟುಂಬಗಳ ಸಂಖ್ಯೆ ಹೆಚ್ಚುತ್ತಿದ್ದರೂ ಸಂಬಂಧಗಳ ಬೇರು ಸಂಪೂರ್ಣ ಸಡಿಲವಾಗಿಲ್ಲ. ಯಾವುದೇ ಭಾರತೀಯ

ಭಾಷೆಯನ್ನಾದರೂ ಗಮನಿಸಿ. ಅದೆಷ್ಟು ಸಂಬಂಧ ಸೂಚಕ ಸರ್ವ ನಾಮಗಳಿವೆ ನಮ್ಮಲ್ಲಿ. ಕುಟುಂಬದ ಹಿರಿತಲೆಗಳಿಂದ ಹಿಡಿದು ಪುಟಾಣಿ, ಪಾವು, ಸೇರು, ಚಟಾಕು, ಪಟಾಕು ತನಕ ಎಲ್ಲಕ್ಕೂ ಪ್ರತ್ಯೇಕ ಸರ್ವನಾಮಗಳಿವೆ. ಅದೇ ಈ ಇಂಗ್ಲೀಷಿನ ಕಥೆ ನೋಡಿ. ಈಜಿಪ್ಟಿಯನ್ ಮಮ್ಮಿ , ಮೋಯಿನ್ ಅಲಿ ದಾಡಿ ಅನ್ನೋದು ಬಿಟ್ರೆ ಅದೇನೋ ಗ್ರಾನಿ, ಗ್ರಾಂಡ್

ಪಾ, ಮತ್ತೇನೋ ಕಾನೂನಾತ್ಮಕ 'ಫಾದರ್ರು , ಮದರ್ರು , ಬ್ರದರ್ರು , ಸಿಸ್ಟರ್ರು' ಇನ್ ಲಾಗಳು, ನೀಸು, ನೇಫ್ಯೂ. ಇಷ್ಟನ್ನು ಹೊರತುಪಡಿಸಿ ಉಳಿಯುವ ಏಕೈಕ, ಭಯಂಕರ ಸರ್ವನಾಮಗಳೇ ಅಂಕಲ್ಲು ಮತ್ತೆ ಆಂಟಿ.

ಬೆಳಗ್ಗೆ ಹಾಲು ಪೇಪರ್ ಹಾಕೋರಿಂದ ಹಿಡಿದು ರಾತ್ರಿ ಗೇಟ್ ಕಾಯೋ ವಾಚ್ಮೆನ್ ತನಕ ಎಲ್ಲಾ ಅಂಕಲ್ಲೂ ಆಂಟಿದೀರೆ ನೋಡಿ. ಇದರಲ್ಲಿ ಅಂಕಲ್ಲುಗಳ ವಿಚಾರ ಸ್ವಲ್ಪ ಪಕ್ಕಕಿರಿಸೋಣ. ಯಾಕೆಂದ್ರೆ ಈ ಗಣ್ಮಕ್ಕಳಿಗೆ ಅಂಕಲ್ ಅನ್ನಿ, ಅಜ್ಜ ಅನ್ನಿ, ಇಲ್ಲಾ ಮುತ್ತಜ್ಜ ಅಂತಾದರೂ ಹೇಳಿ. ಅವರೇನೂ ಬೇಜಾರು ಮಾಡ್ಕೊಳ್ಳಲ್ಲ. ಅವರೊಂಥರಾ ಫಿಕರ್ ನಾಟ್ ಕೆಟಗರಿವರು. 

ಆದ್ರೆ ನಾವು ಮಹಿಳಾಮಣಿಗಳು. ಬಲು ಭಾವುಕ ಜೀವಿಗಳು..... ನಮಗೆ ಅವರಷ್ಟು ಕೇರ್ ಫ್ರೀ ಆಗಿ ಇರೋಕಾಗುತ್ತಾ? ಯಾರಾದ್ರೂ ಆಂಟಿ ಅಂದ್ರೆ ನಮ್ಮ ಮುಖ ಒಣಶುಂಠಿಯಂತೆ ಆಗೋದಂತು ಸತ್ಯ. ಈಗ ಈ ಆಂಟಿ ವೈರಸ್ಸು ವಿಚಾರ ಇಷ್ಟು ಪ್ರಾಮುಖ್ಯತೆ ತಗೋಳಕ್ಕೆ ಏನು ಕಾರಣ ಅನ್ನೋ ಪ್ರಶ್ನೆ ನಿಮ್ಮ ತಲೆ ತುಂಬಾ ಪಿ.ಟಿ

ಉಷಾ ರೇಂಜಲ್ಲಿ ಓಡ್ತಿರುತ್ತೆ. ಅದೇ ಪ್ರಶ್ನೆಗೆ ಉಸೇನ್ ಬೋಲ್ಟಷ್ಟೇ ಫಾಸ್ಟ್ ಎಂಡ್ ಫ್ಯೂರಿಯಸ್ ಆಗಿ ಒಂದು ಉತ್ತರನೂ ನಿಮ್ಮ ತಲೆಗೇ ಬಂದಿರುತ್ತೆ......

'ಓ..., ಮೋಸ್ಟ್ಲೀ ಇವಳನ್ನ ಯಾರೋ ಆಂಟಿ ಅಂತ ಕರ್ದಿರ್ಬೇಕು. ಅದಕ್ಕೇ ಈ ಪೀಠಿಕೆ, ಈ ಸಂಚಿಕೆ' ಅಂತ.

ಆದರೆ ವಿಷಯ ಅದಲ್ಲ. ಇಷ್ಟಕ್ಕೂ ಈ 'ಆಂಟಿ' ಅನ್ನೋ ಪದ ನನಗೆ ಹೊಸದಲ್ಲ. ಬಾಲ್ಯದಲ್ಲೇ ತಲೆಕೂದ್ಲು ಬಿಳಿಯಾಗಿ ಬಾಲನೆರೆ ಆದಂಗೆ ನಾನು ಕಾಲೇಜಿಗೆ ಹೋಗ್ತಿದ್ದ ಟೈಮಲ್ಲೇ ಈ 'ಆಂಟಿ' ವೈರಸ್ ಅಟ್ಯಾಕ್ ಆಗಿತ್ತು ನನಗೆ. 'ಏನಪ್ಪಾ ಇವಳು ಹೀಗಂತಾಳೆ?' ಅಂದ್ರಾ. ಹೌದು ನೋಡಿ. ನಾನು ಬಿ.ಎಡ್ ಓದುವಾಗ ಸೀರೆಯೇ ನಮ್ಮ ಉಡುಗೆ. ಸೀರೆ ಉಟ್ಟ ನೀರೆಯರೆಲ್ಲಾ ಆಂಟಿಯರೇ ಎಂಬ ಸಾರ್ವತ್ರಿಕ ತಪ್ಪು ಕಲ್ಪನೆಯಿಂದಾಗಿ ಆ ಕಾಲದಲ್ಲೇ ಎಲ್ಲರ ಬಾಯಲ್ಲೂ ನಾವು ಆಂಟಿಗಳಾದದ್ದು ಈಗ ಇತಿಹಾಸ. ಆಗಲೇ ಆಂಟಿ ಅನ್ನಿಸಿಕೊಂಡ ನಮಗೆಲ್ಲಾ ಈಗ ಯಾರಾದ್ರೂ 'ಓಯ್ ಅಜ್ಜಮ್ಮಾ' ಅಂತ ಕರೆದ್ರೂ ಏನೂ ಫೀಲ್ ಆಗೋಲ್ಲ. ಆ ರೇಂಜಿಗೆ ಎಮ್ಮೆ ಚರ್ಮದವಳಾಗಿದ್ದೀನಿ ನಾನು. ಅದು ಬಿಡಿ. ಈಗ ನನಗೆ ಈ ಆಂಟಿ ವೈರಸ್ ಬಗ್ಗೆ ಯೋಚನೆ ಯಾಕೆ ಬಂತು ಅಂತ ಹೇಳ್ತೀನಿ ಕೇಳಿ.

ಮೊನ್ನೆ ಸಂಜೆ ಮಗಳನ್ನ ವಾಕಿಂಗ್ ಅಂತ ಪಕ್ಕದ ಪಾರ್ಕಿಗೆ ಕರ್ಕೊಂಡು ಹೋಗಿದ್ದೆ. ಹೇಳಿ ಕೇಳಿ ಪಾರ್ಕು. ಸಂಜೆ ಹೊತ್ತು ಬೇರೆ. ಆಟವಾಡಲು ಬರೋ ಪಾವು, ಸೇರು, ಚಟಾಕು, ಪಟಾಕು, ಪಿಳ್ಳೆಗಳದು ಒಂದು ಗುಂಪಾದರೆ ಟ್ರಿಪಲ್, ಡಬಲ್ ಎಕ್ಸ್ ಎಲ್ ಸೈಜನ್ನು ಒಗೆದು, ಹಿಂಡಿ, ಕರಗಿಸಿ ಜೀರೋ ಸೈಜ್ ಆಗಲು ದೇಹ ದಂಡಿಸುವ ಡುಮ್ಮು , ಡ್ರಮ್ಮು , ಮರಿ ಸಿಂಟೆಕ್ಸ್ , ಸಿಂಟೆಕ್ಸ್ ಗಾತ್ರದ ಬೃಹತ್ ಬಾಲಿಕೆಯರದು (ನನ್ನಂಥವರು) ಇನ್ನೊಂದು ಹಿಂಡು. ಇವೆರಡು ಹಿಂಡುಗಳ ನಡುವೆ ಆಟಕ್ಕುಂಟು ಲೆಕ್ಕಕ್ಕಿಲ್ಲ ಅನ್ನೋ ಗಂಡಸರ ಗುಂಪೊಂದು ಎಲ್ಲೋ ಮೂಲೆಯಲ್ಲಿ ಕಲ್ಲು ಬೆಂಚಿನ ಮೇಲೆ ಹರಟೆಯಲ್ಲಿ ತೊಡಗಿರುತ್ತದೆನ್ನಿ.

ಮೊನ್ನೆಯೂ ಹೀಗೇ ಎಲ್ಲವನ್ನೂ 'ಕಣ್ತುಂಬಿಕೊಳ್ಳುತ್ತಾ' ಮಗಳನ್ನು ಕರ್ಕೊಂಡು ಸುತ್ತರಿತಿರೋವಾಗಲೇ ನನ್ನ ಪಕ್ಕದಿಂದ ಒಬ್ಬಾಕೆ ಅತ್ತ ನಡಿಗೆಯೂ ಅಲ್ಲ, ಇತ್ತ ಓಟವೂ ಅಲ್ಲ ಅನ್ನೋ ವಿಧದ ನಡಿಗೆಯಲ್ಲಿ ಸರಿದುಹೋದರು. ಹಾಗೆ ಹೋಗುವ ಭರಾಟೆಯಲ್ಲಿ ಅವರ ಕೈಲಿದ್ದ ಕರವಸ್ತ್ರ ಕೆಳಗೆ ಬಿತ್ತು. ನಾನು ಅವರನ್ನು ಕರೀಬೇಕು ಅನ್ನುವಷ್ಟರಲ್ಲಿ ಅಲ್ಲೇ ಆಟವಾಡುತ್ತಿದ್ದ ಹುಡುಗನೊಬ್ಬ,

"ಆಂಟೀ...... ನಿಮ್ಮ ಕರ್ಚೀಫು" ಅಂದ್ನಪ್ಪ........!!

ಅಷ್ಟೇ ಹೇಳಿದ್ದು ಅವನು.....!!!

"ಏ ಯಾರೋ ಆಂಟಿ? ನಾನು ನಿನ್ನ ಕಣ್ಣಿಗೆ ಆಂಟಿ ತರ ಕಾಣ್ತೀನಾ" ಅಂತ ಆ ಲೇಡಿ ಆ ಅಬೋಧ ಬಾಲಕನ ಮೇಲೆ ಜಗಳಕ್ಕೇ ಬರೋದಾ.....!!  

ಪಾಪದ ಹುಡುಗ ಅವರ ಆರ್ಭಟಕ್ಕೆ ಬೆದರಿ ಓಟಕಿತ್ತ. ಆ ಮಹಾತಾಯಿ ಮಾತ್ರ ಆಮೇಲೂ ಇಂಗ್ಲೀಷಲ್ಲಿ ಅವನಿಗೆ ಸಂಸ್ಕಾರ ಇಲ್ಲ ಅಂತ ಬೈತಿದ್ರು. ಆದರೂ ಅವರನ್ನು ಸರಿಯಾಗಿ ಗಮನಿಸಿದ ಮೇಲೆ ನನಗೂ ಅವರ ಮಾತಿನಲ್ಲಿ

ಹುರುಳಿದೆ ಅನ್ನಿಸ್ತು ನೋಡಿ.(ಆಕ್ಚುಲಿ ಅವರು ಆಂಟಿ ಅಲ್ಲಾ ಅಜ್ಜಿ ತರ ಇದ್ರು. ಬಹುಶಃ ಅದಕ್ಕೆ ಹಾಗೆ ಹೇಳಿರ್ಬೇಕು) ಆದ್ರೂ ಈಕೆ ವಾಸಿ. 'ಆಂಟಿ' ಅಂತ ಕರೆದಿದ್ದು ಕೇಳಿ ಶಸ್ತ್ರಾಸ್ತ್ರ ಸಮೇತ ಯುದ್ಧಕ್ಕೆ ನಿಂತ್ರು. 'ಆಂಟಿ' ಅನ್ನೋ ಪದ ಕೇಳಿದ್ದೇ 'ಕರೆದರೂ ಕೇಳದೇ, ತಿರುಗಿಯೂ ನೋಡದೇ' ರಾಕೆಟ್ ಸ್ಪೀಡಲ್ಲಿ ಓಡಿ ಮಾಯವಾಗುವವರೂ ಇದ್ದಾರೆ.

ನಮ್ಮ ಬೀದಿ ಮೂಲೆಯಲ್ಲಿರೋ ಅಂಗಡಿಯ ಮಾಲಕಿ ನನಗಿಂತ ಹಿರಿಯಳು.....😁 (ಅದಕ್ಯಾಕೆ ಈ ದಂತ ಪ್ರದರ್ಶನ ಅಂದ್ರಾ? ಯಾರಾದರೂ ನಮಗಿಂತ ಹಿರಿಯರು, ನಾವು ಅವರಿಗಿಂತ ಚಿಕ್ಕವರು ಅಂತ ಹೇಳ್ಕೊಳ್ಳೋಕೆ ಹೆಣ್ಮಕ್ಕಳಿಗೊಂತರಾ ಖುಷಿ ಕಣ್ರಪ್ಪಾ..... It's a psychological fact you know....😉) ಮೊದಲಬಾರಿಗೆ ಅವರ ಅಂಗಡಿಗೆ ಹೋಗಿದ್ದೆ ತರಕಾರಿ ಕೊಳ್ಳಲು. "ಟೊಮ್ಯಾಟೋ ಕೆಜಿಗೆ ಎಷ್ಟು ಆಂಟಿ...." ಅಂತ ಇನ್ನೇನು ಕೇಳ್ಬೇಕು. ಅಷ್ಟರೊಳಗೆ ನನ್ನ ಪುಣ್ಯಕ್ಕೆ ಒಬ್ಬಳು ಕಾಲೇಜು ಕನ್ಯೆ ಬಂದು, "ಆಂಟಿ, ಹಾಫ್ ಲೀಟರ್ ಮೊಸರು ಕೊಡಿ" ಅಂದಿದ್ದೇ ತಡ! "ಅಯ್ಯೋ, ನನಗೇನಮ್ಮಾ ಅಂಥಾ ವಯಸ್ಸಾಗಿರೋದು. ಏನೋ ನಿನಗಿಂತ ಒಂಚೂರು (????) ದೊಡ್ಡವಳಷ್ಟೇ. ಆಂಟಿ ಅನ್ಬೇಡಾ ಅಕ್ಕಾ ಅನ್ನು" ಅಂದ್ಬಿಡೋದಾ?

ಹದಿನೆಂಟರ ಬಾಲಕಿ ಹತ್ತಿರವೇ ಈ ರೀತಿ ಕೇಳಿದ ಆ ಆಂಟಿನ......ಅಲ್ಲಲ್ಲಾ ... ಸಾರಿ...... ಅಕ್ಕನ್ನ ನಾನೆಲ್ಲಾದ್ರೂ ಆಂಟಿ ಅಂದಿದ್ರೆ ಏನು ಕಥೆ ಆಗ್ತಿತ್ತು ನಂದು? ಮೊದಲೇ ಘಟವಾಣಿ ಬಾಯಿ ಅವ್ರದ್ದು. ಪಕ್ಕಾ ಭಾರತದ ಮೇಲೆ ಘಜ್ನಿ, ಘೋರಿ ದಂಡೆತ್ತಿ ಬಂದಂಗೆ ನನ್ನ ಮಾನ ಮರ್ವಾದೆ ಮೂರ್ಕಾಸಿಗೆ ಹರಾಜಾಕ್ತಿರ್ಲಿಲ್ವಾ ಆ ಅಕ್ಕ??

ಆ ಹುಡುಗಿ ಮೊಸರು ತಗೊಂಡು ಹೋಗಿದ್ದೇ 'ಯಕ್ಕಾ ನೀನೇ ದೇವ್ರು, ಯಕ್ಕಾ ತುಮ್ಹೀ ಹೋಂ ಬಂಧು ಸಖೀ ತುಮ್ಹೀ' ಅಂತ ಅವಳಿಗೆ ಮನದಲ್ಲೇ ನೂರೆಂಟು ಪ್ರದಕ್ಷಿಣೆ ಹಾಕಿ, "ಅಕ್ಕಾ ..... ಟೊಮ್ಯಾಟೋ ಕೆಜಿಗೆ ಎಷ್ಟು?" ಅಂತ ಮೂವತ್ತೆರಡು ಹಲ್ಲು ಕಿಸಿದು ಕೇಳಿ ಬಚಾವಾಗಿದ್ದೆ. ಅವತ್ತಿಂದ ಹಿಡಿದು ಇವತ್ತಿನ ತನಕ ಯಾವಾಗ ಅಕ್ಕಯ್ಯನ ಅಂಗಡಿಗೆ ಹೋಗೋದಾದ್ರೂ ಗೇಟು ದಾಟುವಾಗಿಂದ್ಲೇ ಮೈಂಡಿಗೆ ಟ್ರೈನಿಂಗ್ ಕೊಡ್ತೀನಿ...... 'ನೋಡು

ಅಂಗಡಿಗೆ ಹೋಗಿ ಅಕ್ಕಾ ಅನ್ಬೇಕು. ಅಪ್ಪಿತಪ್ಪಿಯೂ ಆಂಟಿ ಅಂದು ಮರ್ಯಾದೆ ಕಳೀಬೇಡ' ಅಂತ. ಇಂತಹ ಮಾನ ಮರ್ಯಾದೆ ತೆಗೆಯೋ ಭಯಂಕರ ಖತರ್ನಾಕ್ ವೈರಸ್ಸು ನೋಡಿ ಈ ಆಂಟಿ ವೈರಸ್ಸು ....

ಈ ಆಂಟಿ ವೈರಸ್ಸಿನ ಸಹವಾಸವೇ ಬೇಡ, ಹೆಸರಿಡಿದೇ ಕರೆದುಬಿಡುವ ಅಂದರೆ ಈ ಹೆಸರುಗಳದ್ದೋ ಇನ್ನೊಂದು ಬಗೆಯ ಅದ್ವಾನ. ನಮ್ಮಲ್ಲಿ ಒಂದೊಂದು ಕಿಲೋಮೀಟರ್ ದಾಟಿದ ಕೂಡಲೇ ಭಾಷೆ, ಮಾತಿನ ಶೈಲಿ, ಸೊಗಡು ಎಲ್ಲಾ ಬದಲಾಗುತ್ತೆ ನೋಡಿ. ಹಾಗೆ ಬದಲಾಗೋ ಶೈಲಿಯೊಂದಿಗೆ ಹೆಸರನ್ನೂ ಕೂಡಾ ಅವರಿಗೆ ಬೇಕಾದಂತೆ ಬದಲಾಯಿಸಿ ಕರ್ಯೋದು ನ್ಯಾಯವೇ? ಈಗ ನನ್ನ ಹೆಸರು ಯಾರ್ಯಾರ ಬಾಯಲ್ಲಿ ಏನೇನಾಗುತ್ತೆ ಅಂತ ಹೇಳೋಕಾಗಲ್ಲ. ನೀತಾ ಅನ್ನೋ ಎರಡಕ್ಷರದ ಸೀದಾಸಾದಾ ಹೆಸರನ್ನು ನೀತ, ನೀತು, ನೀತಿ,

ನಿತ್ಯಾ , ನೇತ್ಯಾ , ನೈತ್ಯಾ....... ಹೀಗೆ ಏನೇನೋ ಕರೀತಾರೆ. ಹಿಂಗೆಲ್ಲಾ ಮಾಡಿದ್ರೆ ಇವರು ಕರೀತಿರೋದು ನನ್ನನ್ನೇ ಅಂತ ನನಗೆ ಗೊತ್ತಾಗೋದಾದರೂ ಹೇಗೆ ನೀವೇ ಹೇಳಿ.....?

ನಾನು ಮಾಸ್ಟರ್ಸ್ ಮಾಡ್ತಿದ್ದಾಗ ಇನ್ಶುರೆನ್ಸ್ ಮ್ಯಾನೇಜ್ಮೆಂಟ್ ಸಬ್ಜೆಕ್ಟಿಗೆ ಒಬ್ಬರು ಮೇಡಂ ಇದ್ದರು. ಎಮಿಲ್ ಮ್ಯಾಥ್ಯೂಸ್ ಅಂತ ಆಕೆಯ ಹೆಸರು. ನಮಗೆಲ್ಲಾ ಅವರ ಹೆಸರು ಒಂಥರಾ ಕ್ವೀನ್ ಎಲಿಜಬೆತ್ ತರ. (ಅವರಿಗೂ ಬಹುಶಃ ನಮ್ಮ ಹೆಸರುಗಳು ಪಜ಼ಲ್

ತರ ಅನ್ನಿಸ್ತಿತ್ತೇನೋ). ಆ ಹೆಸರು ಹೇಳುವಾಗ ಕ್ಲಿಯೋಪಾತ್ರಳ ಹೆಸರನ್ನು ಕೂಗಿದಷ್ಟೇ ಸಂತಸ. ಪಾಪ ಆಕೆ ಮಲೆಯಾಳಿ. 'ತ' ಕಾರ ಯಾವಾಗಲೂ 'ದ' ಕಾರವೇ ಅವರಿಗೆ. ಜೊತೆಗೆ ಅದೇಕೋ ಭಾರತೀಯ ಹೆಸರುಗಳ ಉಚ್ಛಾರಣೆ ಬಲು ತೊಂದರೆ ಅವರಿಗೆ. ಇಂತಿಪ್ಪ ಎಮಿಲ್ ಮ್ಯಾಮ್ ಅಟೆಂಡೆನ್ಸ್ ಕರೆಯೋಕೆ ಶುರುಮಾಡಿದ್ರು ಅಂದ್ರೆ ಅಲ್ಲಿಗೆ ಕಥೆ ಮುಗೀತಂತ್ಲೇ ಲೆಕ್ಕ. ಬಾಲಕ್ಕೆ ಬಿದ್ದ ಬೆಂಕಿಯಿಂದ ಲಂಕೆ ಸುಟ್ಟ ಹನುಮಂತನಂತಾಗುತ್ತಿತ್ತು ತರಗತಿ. 'ನೀತಾ' ಅನ್ನೋದು ಅವರ ಉಚ್ಛಾರಣೆಯಲ್ಲಿ 'ನೀದಾ' ಆಗಿ 'ನೀನ್ ದಾನ್' ಅಂತ ತಮಿಳಲ್ಲಿ ಕೇಳಿದಂತಾಗ್ತಿತ್ತು ನನಗೆ. 'ಪ್ರೆಸೆಂಟ್ ಮ್ಯಾಮ್' ಅನ್ನುವಾಗೆಲ್ಲಾ 'ಆಮ, ಅದ್ ನಾನ್ ದಾನ್' ಅಂತ ಉತ್ತರ ಕೊಟ್ಟ ಫೀಲಿಂಗೇ ಬರ್ತಿದ್ದಿದ್ದು. ಗೆಳತಿ 'ಚೇತನಾ'ಳ ನಾಮಧೇಯ 'ಚೇದನಾ' ಆದ ನಂತರ ಅವಳನ್ನು ಇಡೀ ಕ್ಲಾಸಿನವರೆಲ್ಲಾ 'ಏನೇ ದನಾ' ಅಂತ್ಲೇ ರೇಗಿಸ್ತಿದ್ದಿದ್ದು. 'ಗಣೇಶ್' ಅನ್ನೋದ್ನ 'ಗೆನೇಶ್' ಅನ್ನೋರು.

ಆದರೆ ಇವೆಲ್ಲಕ್ಕಿಂತ ಸ್ವಾರಸ್ಯಕರ ಸಂಗತಿ ಅಂದ್ರೆ ನಮ್ಮ ಕ್ಲಾಸಿನಲ್ಲಿ 'ದರ್ಶನ್ ಕರುಂಬಯ್ಯ ತಿರುನೆಲ್ಲಿಮಾದ' ಎಂಬೋ ಹೆಸರಿನ ಕೊಡವ ಒಬ್ಬನಿದ್ದ.....!! ಪ್ಲೇನ್ ದೋಸೆ

ತರ ಇರೋ ಎರಡಕ್ಷರದ ನನ್ನ ಹೆಸರೇ ಮೇಡಂ ಬಾಯಲ್ಲಿ ಚಿತ್ರಾನ್ನ ಆಗ್ತಿತ್ತು. ಇನ್ನು ಸುರುಳಿ ಸುತ್ತಿದ ಜಿಲೇಬಿಯ ತೆರನಾದ ಕರುಂಬಯ್ಯನ ಹೆಸರಿನ ಮೊಸರಾಗದೇ ಇದ್ದೀತೇ ಅಂದ್ಕೊಂಡ್ರಾ.....? ಖಂಡಿತಾ ಹಾಗಾಗ್ಲಿಲ್ಲ. ಅವರು 'ಕರ್ ರುಮ್' 'ಕರುಮ್' 'ಕುರುಮ್'

ಅಂತ ದಿನಾ ಹಾಜರಿ ಕರೆಯುವಾಗ ಪ್ರಯತ್ನಿಸಿದ್ದು ಬಂತೇ ಹೊರತು ಜಪ್ಪಯ್ಯಾ ಅಂದ್ರು ನಮ್ಮ ಎಮಿಲ್ ಮ್ಯಾಮ್ ನಾಲಿಗೆಗೆ ಕರುಂಬಯ್ಯ ಕೊನೆಗೂ ದಕ್ಕಲೇ ಇಲ್ಲ. ಇಷ್ಟಾಗುವಾಗ ಇದನ್ನು ಹೀಗೇ ಬಿಟ್ರೆ ಮೇಡಂ ಬಾಯಲ್ಲಿ ನಾನು ಕುರುಕ್ಲು ತಿಂಡಿ ಆಗೋಗ್ತೀನಿ ಅಂತ ಕರುಂಬಯ್ಯನಿಗೆ ಕನ್ಫರ್ಮ್ ಆಗೋಯ್ತು. ಹಾಗಾಗಿ ಅವರು ಹಾಜರಿ ಕರೆಯುವಾಗ ಅವನ ಹೆಸರಿಗೆ ಬಂದು

ಇನ್ನೇನು 'ಕ...' ಅಂತ ಆರಂಭಿಸಿದೊಡನೆ 'ಪ್ರೆಸೆಂಟ್ ಮ್ಯಾಮ್' ಅಂದುಬಿಡುತ್ತಿದ್ದ. ಇದರಿಂದಾಗಿ ಅವನ ಹೆಸರು ಹಾಗೂ ಮೇಡಂ ನಾಲಿಗೆ ಇಬ್ಬರೂ ಬಚಾವಾದ್ರು ಅನ್ನಿ.

ತುಳು ಭಾಷೆಯ ಅರಿವಿಲ್ಲದವರಿಗೆ ದಕ್ಷಿಣ ಕನ್ನಡ ಜಿಲ್ಲೆಯ ಊರಿನ ಹೆಸರುಗಳೂ ಹಲವು ಸಂಕಟಗಳನ್ನು ತಂದೊಡ್ಡುವುದು ಸುಳ್ಳಲ್ಲ. ಊರಿಗೆ ಅಧಿಕೃತವಾಗಿರುವ ಹೆಸರಿನೊಂದಿಗೇ ತಮ್ಮ ಭಾಷೆಯಲ್ಲಿಯೂ ಪ್ರೀತಿಯಿಂದ ಅಡ್ಡಹೆಸರಿಡುವ ರೂಢಿ ದಕ್ಷಿಣ ಕನ್ನಡದಲ್ಲಿದೆ. ಹೆಚ್ಚಿನ ಕಡೆ ಅಧಿಕೃತ ಹೆಸರಿಗಿಂತ ರೂಢಿಗತ ಹೆಸರಿನ ಬಳಕೆಯೇ ಹೆಚ್ಚು. ನಾನು ಓದಿಗಾಗಿ ಮೊದಲ ಬಾರಿಗೆ

ಮಲೆನಾಡಿನಿಂದ ಕರಾವಳಿಗೆ ಪಯಣ ಬೆಳೆಸಿದಾಗ ನನಗೆ ತುಳುವಿನ ಗಂಧಗಾಳಿಯೂ ತಿಳಿದಿರಲಿಲ್ಲ. ಕಾರ್ಕಳ ತಲುಪುತ್ತಿದ್ದಂತೆ ಕಂಡಕ್ಟರ್ 'ಕಾರ್ಲ , ಕಾರ್ಲ ....' ಅಂತ ಕಿರುಚಿದಾಗ 'ಕಾರ್ಕಳನ ಕಾಲರ ತರ ಏನೋ ಹೇಳ್ತಿದ್ದಾನಲ್ಲ.... ಇವನಿಗೇನಪ್ಪಾ ಆಯ್ತು' ಅನ್ನೋ ಸೋಜಿಗ ನನಗೆ. ಆಮೇಲೆ ನೋಡಿದ್ರೆ ಮೂಡುಬಿದಿರೆಗೆ 'ಬೆದ್ರ, ಬೆದ್ರ....' ಅಂದಾಗ 'ಪಕ್ಕಾ ಪುಣ್ಯಾತ್ಮನಿಗೆ ನಟ್ಟು

ಬೋಲ್ಟು ಲೂಸಾಗಿದೆ' ಅಂತ ನಿರ್ಧರಿಸಿಬಿಟ್ಟಿದ್ದೆ. ಕುಡುಪು, ಕೈಕಂಬ, ಪಿಲಿಕುಲ, ವಾಮಂಜೂರು, ಕುಲಶೇಖರ, ನಂತೂರು ಅಂತ ಮಂಗಳೂರಿನ ಹತ್ತಿರತ್ತಿರದ ಪ್ರದೇಶಗಳು ಬರುತ್ತಾ ಹೋದ್ವೇ ಹೊರತು ಕಂಡಕ್ಟರ್ ಬಾಯಲ್ಲಿ ಮಂಗಳೂರು ಅಂತ ಬರ್ತಾನೆ ಇಲ್ಲ

ಅನ್ನೋ ತಲೆಬಿಸಿ ನನಗೆ. ಕಡೆಗೊಮ್ಮೆ ಲಾಸ್ಟ್ ಸ್ಟಾಪ್ ಅಂತ ನಿಲ್ಲಿಸಿ 'ಕುಡ್ಲ, ಕುಡ್ಲ.... ಲಾಸ್ಟ್ ಸ್ಟಾಪ್' ಅಂದ ಕಂಡಕ್ಟರ್ ನೋಡಿ ನಾನು ಕಕ್ಕಾಬಿಕ್ಕಿ . ಟಿಕೆಟ್ ತಗೊಂಡಿರೋದು ಮಂಗಳೂರಿಗೆ, ಇವನ್ಯಾವ 'ಕುಡ್ಲ'ದಲ್ಲಿ ಇಳಿಸ್ತಿದ್ದಾನೆ ಅಂತ. ಬಸ್ಸಿನಲ್ಲಿರೋ ಎಲ್ಲರೂ ಅವರ ಪಾಡಿಗವರು ಇಳಿದು ಹೋಗ್ತಿದ್ದಿದ್ದು ಬೇರೆ ನೋಡಿ ನನಗೆ ಅನುಮಾನ ಬಂದು ಹೊರಗೆ ಅಂಗಡಿಗಳ ಬೋರ್ಡ್ ನೋಡಿದ್ರೆ

ಎಲ್ಲದರಲ್ಲೂ 'ಮಂಗಳೂರು' ಅಂತಿದೆ.....!! ಇನ್ನು ತಾಳಲಾರೆ ಈ ವೇದನೆ ಅಂತ ಅಪ್ಪನತ್ರ ಕೇಳೇಬಿಟ್ಟೆ ಎಂತಪ್ಪಾ ಇದು ಅಂತ. ಆಗ ಗೊತ್ತಾಯ್ತು ನನಗೆ ತುಳುವಲ್ಲಿ ಕಾರ್ಕಳನ 'ಕಾರ್ಲ' , ಮೂಡುಬಿದಿರೆಗೆ 'ಬೆದ್ರ' , ಮಂಗಳೂರಿಗೆ 'ಕುಡ್ಲ' ಅಂತ ಕರೀತಾರೆ ಅಂತ. ಬೇಕಾ ನನ್ನ ಅವಸ್ಥೆ.

ನನ್ನ ಮದುವೆಯಾದ ನಂತರ ಒಮ್ಮೆ ನಮ್ಮೆಜಮಾನರ ಅಜ್ಜಿ ಮನೆಗೆ ಹೋಗಲೆಂದು ಬೆಂಗಳೂರಿನಿಂದ ಹೊರಟೆವು. ಉಪ್ಪಿನಂಗಡಿ ಬರುವಾಗ ನನಗೆ ಮತ್ತದೇ ಪುರಾತನ ಸಮಸ್ಯೆ....... ಆದರೆ ಈ ಬಾರಿ ಮಾತ್ರ ಭಯಂಕರ ಆಶ್ಚರ್ಯವಾಗಿತ್ತು ನನಗೆ. 'ಉಬರ್, ಉಬರ್....' ಅಂತ ಬಡ್ಕೊಂಡ ಕಂಡಕ್ಟರ್ ಕಂಡು ಯಾರಿಗೆ ಅಚ್ಚರಿಯಾಗದು ನೀವೇ ಹೇಳಿ? ಬೆಂಗಳೂರಲ್ಲೇ

ಓಲಾ, ಉಬರ್ ಸಿಗುವುದು ಕಷ್ಟವಾಗಿರುವ ಕಾಲದಲ್ಲಿ ಉಪ್ಪಿನಂಗಡಿಯಲ್ಲಿ ಉಬರ್ ಕಂಡರೆ ಹೇಗಾಗಬೇಡ? ನನ್ನ ತಲೆಕೆಟ್ಟು ಗೊಬ್ಬರವಾಗದೇ ಇದ್ದೀತೇ? ಉರಿಯೋ ಬೆಂಕಿಗೆ ತುಪ್ಪ ಸುರಿಯುವಂತೆ ನನ್ನ ಈ ಭಯಂಕರ ಅನುಮಾನ ಕೇಳಿ ನನ್ನ ಗಂಡ ನಗಬೇಕಾ??? ಕೋಪದಿಂದ ತಾರಾಮಾರ ಆದ ನನ್ನನ್ನು ಕಂಡು ಇನ್ನಷ್ಟು ಜೋರಾಗಿ ನಗುತ್ತಾ, "ಮಾರಾಯ್ತೀ, ಮರ್ಯಾದೆ ತೆಗೀತೀಯಾ ನೀನು. ಅದು ಉಬರ್ ಅಲ್ವೇ. ಉಪ್ಪಿನಂಗಡಿಗೆ ಇಲ್ಲೆಲ್ಲಾ 'ಉಬ್ಬಾರ್' ಅಂತಾರೆ. ಈ ಕಂಡಕ್ಟರುಗಳು ಫ್ಲೋ ಅಲ್ಲಿ

ಹೇಳ್ತಾ 'ಉಬ್ಬಾರ್' ಅನ್ನೋದು 'ಉಬರ್' ತರ ಕೇಳಿಸುತ್ತಷ್ಟೇ" ಅಂದಾಗ ನನ್ನ ಮುಸುಡಿ ಸುಟ್ಟ ಬದನೆಕಾಯಂತೆ ಆದದ್ದು ಸುಳ್ಳಲ್ಲ.

ಕೆಟ್ಟ ಮೇಲೆ ಬುದ್ಧಿ ಬಂತು ಅನ್ನೋ ಹಾಗೆ ಇಷ್ಟೆಲ್ಲಾ ಹಗರಣಗಳ ನಂತರ ಈಗ ಯಾವ ಜಾಗದ ಯಾವ ಊರಿನ ಹೆಸರನ್ನಾಗಲೀ ಅಂಗಡಿ ಮುಂಗಟ್ಟುಗಳ ಬೋರ್ಡನ್ನ ನೋಡಿಯೇ ಕನ್ಫರ್ಮ್ ಮಾಡ್ಕೊಳ್ಳೋದು ನಾನು. ಹೀಗಿರುವಾಗ 'ಹೆಸರಲ್ಲಿ ಏನಿದೆ? ಏನೋ ಒಂದು ಕರೆದ್ರಾಯ್ತು' ಅಂತ ಹೇಳೋಕಾಗುತ್ತಾ ನೀವೇ ಹೇಳಿ.....?

'ಆಂಟಿ' ಅಂದ್ರೆ ಅನ್ನಿಸಿಕೊಂಡವರಿಗೆ ಕೋಪ........

ಹೆಸರಿಡಿದು ಕರೆಯುವಾಗ ಹೆಸರು ಆಚೀಚೆ ಆದರೆ ಕರೆಯುವವರಿಗೆ ಶಾಪ.........

ಅಬ್ಬಬ್ಬಾ 'ನಾಮ(ಧೇಯ)' ಪುರಾಣದಲ್ಲಿ ಅದೆಷ್ಟು ಲೋಪ ......!!!