ಮಿತಿ ಪುಸ್ತಕ ಪರಿಚಯ

ಪುಸ್ತಕದ ಹೆಸರು.       : ಮಿತಿ

ಲೇಖಕರು               : ಧೀರಜ್ ಪೊಯ್ಯೆಕಂಡ

ಪ್ರಕಾಶಕರು             : ದೇವಕಿ ಪ್ರಕಾಶನ, ಬಂಟ್ವಾಳ

ಮೊದಲ ಮುದ್ರಣ     : 2020

ಪುಟಗಳು      :191         ಬೆಲೆ       :180ರೂ

ಪ್ರತಿಯೊಬ್ಬ ವ್ಯಕ್ತಿಯ ಬದುಕಿಗೂ ಒಂದು ಪರಿಧಿಯಿರುತ್ತದೆ. ಬದುಕುನುದ್ದಕ್ಕೂ ಅನಿರೀಕ್ಷಿತವಾಗಿ ಒದಗುವ ಹಲವಾರು ಸಂದರ್ಭ ಸನ್ನಿವೇಶಗಳು ನಮ್ಮ ಅನುಭವದ ಪರಿಧಿಯನ್ನು ಹಿಗ್ಗಿಸುತ್ತದೆ. ಅನುಭವದ ಪರಿಧಿ ವಿಸ್ತಾರವಾದಂತೆ ಬದುಕಿನೆಡೆಗೆ ದೃಷ್ಟಿಕೋನವೂ ಬದಲಾಗುತ್ತದೆ. ಈ ಪ್ರಕ್ರಿಯೆ ಪ್ರತಿಯೊಬ್ಬರ ಬದುಕಿನಲ್ಲೂ ನಿರಂತರ. ಈ ಹಾದಿಯಲ್ಲಿನ ಮನೋ ವಿಪ್ಲವಗಳು, ಸಂಬಂಧಗಳ ನಡುವಿನ ಭಾವ ಸಂಘರ್ಷಗಳನ್ನೇ ಜೀವಾಳವಾಗಿಸಿಕೊಂಡಿರುವ ಕಾದಂಬರಿ ಮಿತಿ. ಈ ಕಾದಂಬರಿಯ ಕಥಾವಸ್ತುವೇ ಇದರ ವೈಶಿಷ್ಟ್ಯ. 

ಇಲ್ಲಿ ದೊಡ್ಡ ದೊಡ್ಡ ಆದರ್ಶ ಹೊಂದಿದ ಮಾದರಿ ನಾಯಕ ನಾಯಕಿಯರಿಲ್ಲ. ಕೆಡುಕುಗಳೇ ಮೈವೆತ್ತ ಒಬ್ಬ ಖಳನಾಯಕನಿಲ್ಲ. ನಾಯಕ ನಾಯಕಿಯರ ಉದಾತ್ತತೆಯನ್ನು ತೋರಲು ಸಹಕಾರಿಯಾಗುವ ಪೋಷಕ ಪಾತ್ರಗಳಿಲ್ಲ. ಹಾಗಾದರೆ ಇಲ್ಲಿರುವುದಾದರೂ ಏನು ಎಂದು ಕೇಳಬಹುದು ನೀವು. ಇಲ್ಲಿರುವುದು ನಮ್ಮ ನಿಮ್ಮಂತಹ ಸರ್ವೇ ಸಾಮಾನ್ಯರು. ಅವರೊಳಗೆ ಒಳ್ಳೇತನವಿದೆ. ಅದರ ನಡುವಲ್ಲೇ ಕನಲಿ ಹೊಗೆಯಾಡುವ ಕೆಡುಕಿದೆ. ಇಲ್ಲಿನ ಯಾವೊಂದು ಪಾತ್ರವೂ 'ಪರ್ಫೆಕ್ಟ್' ಎಂಬ ಹಣೆಪಟ್ಟಿಯನ್ನು ಹೊತ್ತುಕೊಂಡಿಲ್ಲ. ಆದರೆ ಬದುಕನ್ನು ಹೇಗೆ ನಮ್ಮ ಮಟ್ಟಿಗೆ ಪರಿಪೂರ್ಣವಾಗಿಸಿಕೊಳ್ಳಬಹುದೆಂಬ ಪಾಠವನ್ನು ಇಲ್ಲಿನ ಪಾತ್ರಗಳು ನಮಗೆ ತಿಳಿಸುತ್ತವೆ. ಮನುಷ್ಯ ಸ್ವಭಾವಗಳ ಪ್ರಾಮಾಣಿಕ ಅನಾವರಣದ ಕಾರಣಕ್ಕಾಗಿಯೇ ಈ ಕಾದಂಬರಿ ಬಲು ಆಪ್ತವಾಗುತ್ತದೆ.